1Cor 1 | PMA | STEP | Inau, Pol, koa Ahi vise nau mahi eiloheh onen Iesu Kristo musil rendemien onen, namul namutis leta koanik ral min Sostenis koa vi tuer en demkatien.

a 1:2Umen 18:1

b 1:10Pil 2:2

c 1:12Umen 18:24-28

d 1:14Umen 18:8

e 1:14Rom 16:23; Umen 19:29

f 1:16 1 Kor 16:15

g 1:20Siob 12:7; Aes 44:25

h 1:21 Mat 11:25

i 1:22 Mat 12:38; Sion 4:48

j 1:22Umen 17:18-21

k 1:23Rom 9:32; 1 Kor 2:14

1 Corinthians 1

Selusien koa helamu

1 Inau, Pol, koa Ahi vise nau mahi eiloheh onen Iesu Kristo musil rendemien onen, namul namutis leta koanik ral min Sostenis koa vi tuer en demkatien.

2 Namutis vat min kami koa mivi Sios onen Ahi en out Korin, ^a koa Ahi mumon kami mivi onen ka en asa koa Iesu Kristo mumoni. Anatin, Ahi vise kami mivi meatin votut keil onen, suval koa mumoni en moulien onen Kristin vasi keil en out vasi koa amul aling demkatien one en Iesu Kristo, Asuv one ka Asuv orer.

3 Navisi keke Ahi Tamer ka Asuv Iesu Kristo luhesan more envatien ka tomat onealu hel en kami.

Pol Masmas Ahi ven Tounah koa Kei Mumoni en Moulien onen Kristin Keil ten out Korin

4 Lisenges namasmas Ahi ven kami veni kei rie lat more envatien onen min kami koa mikapil ral min Iesu Kristo. 5 Anatin, veni navong mikapil ral mini, mimai mivilelau en tounah vasi keil ten demkatien en usite koa Ahi maen kami mikilea en selusien onen ka mikilea mivahit luvati. 6 En sise koanik, more longlongien usil Iesu Kristo koa komai meviteni min kami kur heite en moulien onami keke meatin sav keil akilea avalesi. 7 Anatin, kami mirtamureitei en etai sanien koa Ninin Votut mul sani. Ka mimul mimum ral min sanien keil enek navong mirosin avong koa Ahi hehothot en Iesu Kristo, Asuv orer. 8 Ahi hesan keihoen min kami keke mihelomal hekeih en demkatien onami hetokol avong koa Iesu Kristo hemai ris eni. Houmoni hemukonek keke navong kei houmon kot en meatin keil, tounah hetovuol hehotini hetisa en usite onami. 9 Ahi vinvin keke mivaling desien onami eni. Kei varei vise kami mivapil vatal min Natnali, koa vi Iesu Kristo, Asuv orer.

Hihiseien keke Kristen Keil Anatasiltei ka Mukave More Longlongien usil Iesu Kristo Teisav en Selusien Sav Keil ten out Netan

10 Tuak ka ahinkuli keil en demkatien, en isen Iesu Kristo, Asuv orer, nasel kat kami keke miheto en tomat hetal min kami. Anatin, en tounah vasi koa mimul mimumoni, mihoum vituai eni. Ka en tounah koa mikul anatin eni, rendemien onami hetas. ^b Sakien ten selien ka tasilien hetovuol en kami. 11 Namul naviteni mukok veni nakur longlongien ka ven koakeil en teim sen Kloe keke kami, tuak ka ahinkuli keil, mimul mimusel en kami eris. 12 Anatin, naraengoni keke mimul miriti vas kami mukok: tei en kami mivit, “Komai memusil kat Pol.” Ka kami koa mun mivit, “Komai memusil kat Apolos.” ^c Ka teimun en kami avit, “Komai memusil kat Pita”; ka tei sav emun en kami amul avit, “Komai memusil kat Kristo.” 13 ?!Mukave, mimundemi keke mikilea mivatali vas aven Iesu Kristo vamukonek!? ?Mukave? ?Inau, Pol, numat en aiveave navinat kami? ?Avi baptaes en kami en isok keke mivamai mivahi meatin keil onak? !Vuo, romukteinek!

14 Navong naraengoni mukonek, namasmas Ahi keke narvi baptaes entei houlu en kami. Namumonis en Krispas ^d ka Kaias. ^e 15 Nasinau, veni, mukonek, tovuol en kami kilea vahiteni keke navi baptaes en kei en isok. 16 O anatin eli, ekvobongeni keke navi baptaes en Stefanas ^f ka onen keil. Ka narmundem kat etai mun en kami koa navi baptaes eni. 17 Veni navong Iesu Kristo sila nau, rovitei keke mal mahi baptaes en meatin keil. Vuo. Kei sila nau mahitehiten more longlongien usil kei en sakien koa romusiltei meteisauen onen meatin keil enges. Veni hertahostei munak aling desien one en more selusien keil onak ka irlingtei desien one en keihoen koa ka en matien onen Iesu Kristo en aiveave.

18 Narsantei selusien onak natal min meteisauen onen meatin keil, veni navong koakeil amul en sise ten matien akur longlongien usil matien onen Kristo en aiveave avit, “Selusien enek vi varu.”

Ka navong ir koa Ahi mul mutut ir ran mahien ten tisaen keil orer rolong usili, rovit, “Selusien koanek mul rie lat keihoen onen Ahi.”

19 Suval koa Tus Votut viteni koa vit,

“Nu rasilin meteisauen onen koakeil avi meteisau,
ka nisakin ileilien onen meatin keil akileile hehi heisav enges.”(Aes 29:14)
20 ?Sakini, mukave en koakeil avit avi meteisau? ?Vuo koakeil avit akileile? ?Vuo koakeil ten avong enek koa evati mok avaselus rahit en tounah houlu? Ahi varei mul sakin meteisauen vasi keil onen meatin keil koa amukonek ten out netan mai vi varu enges. ^g 21 Koanek anatin veni Ahi koa vi meteisau imok mumoni keke meatin keil ten out netan asakras avahotin kei vaka en sise ten vati meteisauen one. Vuo, Ahi lingi keke selusien orer, koa keil avit vi varu, hemai hehi sise koa houtut meatin keil koa imai ikul anatin en Iesu Kristo heka eni. ^h

22 Anatin, alonge suval selusien orer vi varu. Veni Siu keil evati avales merikel keil keke avakul anatin en tounah, ⁱ ka koakeil arvitei Siu evati avataengon selusien ten meteisauen keke avakul anatin en tounah. ^j 23 Ka ir, navong rovitehiten asa koa Iesu Kristo mumoni venir navong amuti kati en aiveave, Siu keil arkultei anatin eni, veni romaltei en rendemien one; ka koakeil arvitei Siu emun arkultei anatin eni, veni amundemi avit vi varu enges. ^k 24 Ka min koakeil Ahi vise keil, avaseini avi Siu vuo arvitei Siu, more longlongien koanik usil Kristo rie lat keihoen ka meteisauen onen Ahi. ^l 25 Veni asa koa avit rie lat varuen onen Ahi, kei rie lati keke Ahi vi meteisau imok mulin meteisauen onen meatin keil ten out netan. Ka asa koa avit rie lat merauen onen Ahi, kei rie lati keke Ahi keih imok mulin keihoen onen meatin vasi keil. ^m

26 Tuak ka ahinkuli keil, en usite ten rendemien koanik mihendem visi, mimukave navong Ahi vise kami mivi onen. En rendemien onen meatin keil ten out netan, rovitei houlu en kami koa mivi meteisau, vuo mikur keihoen, vuo mivi hetetamen keil. Houlu en kami mivi meatin kuren enges. 27 Ka Ahi rie lat kami koa mivi varu en meten meatin keil ten out netan keke mivahi onen vasakin koakeil avi meteisau avamemou eni. Ka Ahi rie lat koakeil arkurtei keihoen en out netan vasakin koakeil akur keihoen avamemou eni. 28 Anatin, Ahi rie lat meatin kuren keil koa meatin sav keil alei sesein keil ka amundem heisav en keil. Mumoni mukonek vasakin hetetamenien ten out netan hemai hehi heisav enges. 29 Sakini, meatin tovuol kilea vahasi kei sasen en meten Ahi. 30 Veni Ahi enges sakin kami mikapil ral min Iesu Kristo. Ka Iesu esuk, kei mai vi meteisauen ka maluen orer, ⁿ kei enges sakin ir rovi votut ka romaluv ran tisaen orer. 31 Sakini, suval koa Tus Votut viteni, ^o“Kei koa envati vahasi, kei hehasi en tounah enges koa Iahova mumoni.”(Ser 9:24)